De la Biche et sun Foon

Une Bisse chastieit jà Un sien Fooo qu'ele mena Cum se deveit des Ciens garder, E des Vénéours desturner ; Del' Leu que il ne l'encuntrast Qu il ne l'océist è menguast. Si cum aleient ainsi parlant Si unt wéu un Hum errant ; Arc purteit , sajette , bouzuns. Sa Mère apela li Fauns Demanda li qui chius Hum fu ? La Bisse li a respundu C'est cil dunt plus te dois crémoir E graignur pavor puès avoir. Mès or l'esgarde bien de près Se tu l'encuntreies jamès Ke de lui te saces garder. Moi n'estuet pas, fet-il, duter Il ne nus velt faire nul mal ; De l'autre part de sun Cheval Est descenduz , si s'est muchiez, E de nus veir est esmaiez. Nenil , biaus fix , n'i a noient Ainz esgarde hardiément S'il va sun fust appareillant. Un grant mail a el chief devant Se il le fait vers nus venir Le mal en purrons bien sentir ; Mix est que nus nus enfuiuns. Dunc li respundi li Foouns, Ne fuirai pas devant qu'il traie, Qu'ele aventure ke g'en aie.

MORALITÉ.

En répruvier dist-hum suvent Qe Fox ne crieut desi qu'il prent ; Qant Fox ne ve.t creire le saige Suvent en puet aveir damaige.