Ouis, Canis et Lupus

Solent mendaces luere poenas malefici. Calumniator ab oue cum peteret canis, quem commendasse panem se contenderet, lupus, citatus testis, non unum modo deberi dixit, uerum adfirmauit decem. Ouis, damnata falso testimonio, quod non debebat, soluit. Post paucos dies bidens iacentem in fouea prospexit lupum. 'Haec' inquit 'merces fraudis a superis datur'.