Li tri casini

'Na vota s'arriccunta ca cc'era un Re, ca avia un sulu figghiu ca 'un vulia sèntiri propria di maritarisi. La raggiuni era ca tinia 'na picciotta ca cci facia scurdari a tutti, e chista cci avia 'ncatinatu lu cori. Ora stu Riuzzu, 'un putiènnusi luvàri a stu patri di 'ncuoddu, un jornu cci dissi: — «Papà, mi maritu, ma c'un pattu: ca m'aviti a mannari a pigghiari li ritratti di tutti li figghi di li Rignanti; chidda ca mi talenta, mi la pigghiu». Lu patri fu lestu a mannari li so' currieri, e appi tutti li ritratti ca vulia. Lu Riuzzu ca cci avia dittu sta cosa, cridiennu ca saria statu 'mpossibuli di putilli aviri, si truvau 'ntra l'acqua di l'aranci, e appi a scègghiri 'ntra tutti. Scigghíu la figghia di lu Re Turcu, e tra puochi jorna ficiru tutti cosi. Ma appena spusati, lu Riuzzu la lassau 'n tridici, e si ciudíu 'ntra 'na cammira senza vuliri parrari cu nuddu.

La Riggina matri 'un sapia comu fari pi falli 'nsimmulari, e pinsau di fari accussì: — Fici frabbricari tri casini 'nta tri loca diversi, e li fici pittari una russa, una cilesti, e una virdi. 'Na matina 'nvitau a 'na puocu di Granni 'nta la casina russa, faciènnuli vèstiri russi, e si purtau lu figghiu.

Dduoppu lu pranzu, mentri lu figghiu passiava 'nta lu jardinu, cci fa calari la picciotta. Passiannu, passiannu, idda, ca era avvisata, cci addummannau: — «Riuzzu, mi la cugghiti 'na lumia?» Lu Riuzzu cci la côsi: idda nesci lu cutieddu pi munnalla: tàffiti! e si tagghia lu jitu e si metti a diri: — «Vilinatu lu cutieddu! Vilinatu lu patruni!» e cianciennu si l'attacca e va da la Riggina, ca fu lesta a pàrtiri cu tutti l'amici. — A la 'nnumani partinu 'n'autra vota pi la casina cilesti, e successi lu stissu fattu. A la tagghiata di lu jitu, nuovamenti si la sfilittaru. N'àutru juornu vanu ni la casina virdi, e succedi la stissa stùria; ma sta vota lu Riuzzu nun ni potti cciui, e va 'nta la matri a dumannàricci chi cci avia fattu a la Rigginotta ca lu ciamava vilinatu: — «Chi cci hai fattu! cci arrispunni la matri; vieni ccà,» e lu porta 'ntra la càmmira unni era la picciotta. La truvaru cu li tri jita attaccati: chi vuliti? l'amuri truvau lu sò luocu, e lu Riuzzu si l'abbrazzau pri gudìrisi li jorna filici e cuntenti.

Noto.