Lu cani 'nfatatu

Si raccunta ca cc'era 'na vecchia ch'avia 'na niputi bedda. Avianu accattatu un tumminieddu di frumientu; lu mannàru a lu mulinu, e lu ficiru tuttu a pani. La nanna si nni ij' a la Missa, e dissi a la niputi: — «Duna accura a la puni, Ruosa; quannu viegnu ia, gamiammu lu furnu, e lu 'nfurnammu. Na mentri, vinni un cani, si lu aggrampa e si lu porta; la niputi si cci misi appriessu, camina di ccà, camina di ddà, e lu cani si 'nfila 'ntra un palazzu. La picciotta si 'nfila appriessu: nni ddu palazzu cc'era un Riuzzu, e cci dissi: — «Oh quant'havi chi ti aspiettu! ora nni âmmu a 'nguaggiari.» — «Sissignura, ma haju la nanna ia e la vuogliu ccà.» Lu Riuzzu piglia 'na carrozza e la manna a piglia; pùa la vesti cu un bellu àbbitu, e la viecchia cci dici: — «Vuogliu essiri assittata a lu giru di mà niputi.» Rispunni lu Riuzzu: — «Vi sia cuncessa, signura zia;» e mentri era nni la cummirsazioni di lu fistinu, la vecchia cci dicía a la gurìcchia a la niputi: — «Chi nni facisti di lu tumminieddu di lu pani?» Rispunni la niputi: — «Zittìtivi, com'ora.» Cci dissi lu Riuzzu: — «Chi voli la signura zia?» — «Voli n'àbbitu cuomu lu mio.» — «Subbitu si facissi.» Pùa si nni jeru a tavula, e cci riplicà' la stissa cosa. — «Chi nni facisti di lu tumminieddu di lu pani?» Rispunni lu Riuzzu: — «Chi voli la signura zia?» — «Voli fattu un anieddu cuomu lu miu.» — «Subbitu si facissi.» Pùa cci rieplica la vecchia: — «Chi nni facisti di lu tumminieddu di lu pani?» Rispunni lu Riuzzu: — «Chi voli la signura zia?» La niputi nu putiennu cchiù suffriri a la sò nanna dissi: — «Voli essiri jittata di lu finistruni appinninu.» Subbitu fu pigliata, e jittata di lu finistruni appinninu; e accussì la niputi si la livà' di davanti. Cuomu la vecchia fu jittata di lu finistruni, ddà sutta cc'èra lu jardinu, e unni cadì' la vecchia affaccià' 'na bella pièrgula di racina fatta; lu Riuzzu e la Zita doppu manciari si nni jeru a passiari nni lu jardinu, e vidinu sta piergula carricata fora tiempu, e facia càvudu, e si misiru all'ùmmira, e si misi a circari la testa di lu Riuzzu; cadi un cuòcciu di racina, e l'abbenni nni la guricchia; idda jetta un scàccanu. Lu Riuzzu cci dissi: — «Pirchì jittasti stu scàccanu?» — «Ma', pri nenti.» — «No, lu vuogliu sapiri.» E la zita nu cci lu vulia diri; lu Riuzzu cci dissi: — «O mi lu dici o ti tagliu la tiesta.» Idda cci dissi: — «Lu ma scàpulu è miegliu di lu tò mantu.» Iddu rispusi: — «Lu vuogliu vidiri, manzinò si' dicapitata di testa.» Custritta nni fu di ricurriri a lu cani. — «Canuzzu miu, tu m'ha' a dari ajutu.» Lu cani cci dissi: — «Vieni appriessu di mia.» Dici la muglieri: — «Va, Re, vieni appriessu di mia.» Si minti lu cani davanti, e iddu appriessu; lu cani arriva primu, e li porta nni lu vecchiu dragu, e cci dici: — «Ancora ccà stati? ca stà vieniennu lu Re cu li truppi ca v'havi a 'mmazzari!» Avianu un puzzu e lu jittaru nni lu puzzu. Arriva lu Riuzzu cu la muglieri e firrianu tutta la casa e trovanu lu scàpulu tuttu addoratu, e tanti dinari, e cosi priziusi; si ficiru carricari tutti li dinari, e li cosi di 'mpurtanza e si nni jeru a la cità.

Iddi ristaru cuntenti e filici

E nu' a la bracera cu l'amici.

Casteltermini.