On jou, konpè Genbo asi on gwo pyébwa,
Té ka manjé on kwi farin, patat é pwa.
Konpè Rakoun té ka drivé anba bwa-la,
Santi bon lòdè-la, i di : “Fo an manjé sa.”
Tala i té la la, sé-y ki ban-nou fré-la!
Pa mandé-nou kimoun ésa ki té la la!
Tout zévan a-y wouvè, Rakoun suiv lòdè-la.
On lè, i lévé né a-y, ka i ka vwè anlè-la?
Asi on fwomajé, Genbo pann gyèl anba,
Tèt- ay adan on kwi farin, patat é pwa!
“Kijan monchè konpè ou pé la ou yé la?
Sòti a mòlòkòy ka di an ravin-la,
Bondyé envité tout bèt a zèl an syèl-la,
Toutmoun ja anlè-la, anni vou ki pa la!”
Genbo an tan-lasa té moun a gran wacha,
Ansanm i antann sa, i paré pou channda.
Lanprèsman chapé vitman-présé anlè-la,
Zòt pa bizwen mandé, kwi-la alélouya!
Rakoun pa ped lakat, i té ka atann sa,
Rivé sipé kwi-la é pran ri kra! Kra! Kra!
“Mèsi monchè konpè, an jan an té fen la,
An pa jan konpwanndi ou té kanklo konsa!”
Sé dépi jou-lasa, zòtout pé ja vwè sa,
Genbo pa ka janmé manjé lè i tèt anba.
Ki sé pou sapoti, kòwòsòl, pwa-di-bwa,
Toupannan i ka volé i ka pipigné sa!
Genbo sa pé sé vou, Rakoun nenpòt sila
Ka chèché trapé ti dèkwa-la ou ni la.
Chonjé : “pisimyé on ti kayi ou ni jòd-la,
Olyé ou konté dèmen asi on gwo taza.”